परळी-अंबाजोगाई महामार्गावरील हॉटेल नंदनवनजवळ रात्रीची दुर्घटना; दुचाकीचा चक्काचूर, अपघाताचे कारण शोधण्याचे काम सुरू
परळी | प्रतिनिधी
परळी-अंबाजोगाई महामार्गावरील कन्हेरवाडी घाटात मंगळवारी (७ जुलै) रात्री झालेल्या भीषण दुचाकी अपघातात परळी शहरातील संत सावतामाळी नगर येथील दोन युवकांचा जागीच मृत्यू झाला, तर त्यांच्यासोबत प्रवास करणारा आणखी एक युवक गंभीर जखमी झाला आहे. या हृदयद्रावक घटनेमुळे परळी शहरासह परिसरात शोककळा पसरली आहे.
प्राथमिक माहितीनुसार, गणेश मुरुळे, मुंजा मिसाळ आणि त्यांचा एक मित्र हे तिघे दुचाकी (क्र. MH-44 AA-3064) वरून अंबाजोगाईहून परळीकडे जात होते. रात्री सुमारे ९ वाजण्याच्या सुमारास कन्हेरवाडी घाटातील हॉटेल नंदनवनजवळ त्यांच्या दुचाकीचा भीषण अपघात झाला. अपघाताचा जोर इतका प्रचंड होता की दुचाकीचा अक्षरशः चुराडा झाला आणि तिघेही रस्त्यावर फेकले गेले.
घटनेची माहिती मिळताच परिसरातील नागरिकांनी तातडीने धाव घेत जखमींना परळी उपजिल्हा रुग्णालयात दाखल केले. मात्र, वैद्यकीय अधिकाऱ्यांनी गणेश मुरुळे आणि मुंजा मिसाळ यांना तपासून मृत घोषित केले. तिसऱ्या युवकावर उपचार सुरू असून त्याची प्रकृती चिंताजनक असल्याचे सांगण्यात येत आहे.
या दुर्घटनेची बातमी संत सावतामाळी नगर परिसरात समजताच नातेवाईक, मित्रपरिवार आणि नागरिकांनी रुग्णालयात मोठी गर्दी केली. दोन तरुणांच्या अकाली निधनाने परिसरात हळहळ व्यक्त होत असून अनेक कुटुंबांवर दुःखाचा डोंगर कोसळला आहे.
अपघाताचे नेमके कारण अद्याप स्पष्ट झाले नसून, अतिवेग, घाटातील तीव्र वळण किंवा इतर कोणते तांत्रिक कारण याबाबत पोलीस तपास करत आहेत. घटनास्थळी पंचनामा करण्यात आला असून पुढील तपास सुरू आहे.
या अपघाताने पुन्हा एकदा घाटरस्त्यांवरील सुरक्षित वाहनचालना, वेगावर नियंत्रण आणि वाहतूक नियमांचे पालन किती महत्त्वाचे आहे, याची जाणीव करून दिली आहे. क्षणिक निष्काळजीपणामुळे दोन तरुणांचे आयुष्य संपले, तर आणखी एक युवक जीवन-मरणाच्या संघर्षात आहे.
About The Author
