खामगाव शिवारातील घटनेने परिसरात खळबळ; रस्त्याच्या कामातील निष्काळजीपणाची चौकशी करण्याची नागरिकांची मागणी
दिंद्रुड प्रतिनिधी :
दिंद्रुड–सिरसाळा महामार्गावर खामगाव शिवारात झालेल्या भीषण अपघातात एका युवकाचा दुर्दैवी मृत्यू झाल्याची घटना समोर आली आहे. ब्रिजवरील खड्ड्यात बुलेट मोटारसायकल कोसळल्याने हा अपघात घडल्याची माहिती आहे. या घटनेमुळे परिसरात हळहळ व्यक्त होत असून महामार्गाच्या कामाच्या दर्जाबाबत आणि सुरक्षिततेबाबत गंभीर प्रश्न उपस्थित केले जात आहेत.
या अपघातात संबंधित युवकाची बुलेट मोटारसायकल ब्रिजवरील खड्ड्यात कोसळली. अपघाताची तीव्रता लक्षात घेता युवकाचा मृत्यू झाला. अपघातग्रस्त बुलेटचा क्रमांक MH 28 CG 7034 असा आहे.
दरम्यान, महामार्गावरील ब्रिजच्या कामात निष्काळजीपणा झाल्यामुळेच हा अपघात घडल्याचा आरोप स्थानिक नागरिकांकडून करण्यात येत आहे. रस्त्यावरील खड्डे, अपूर्ण कामे आणि आवश्यक सुरक्षा उपाययोजनांचा अभाव यामुळे वाहनचालकांच्या जीवाला धोका निर्माण होत असल्याची नाराजी नागरिकांनी व्यक्त केली आहे.
कंत्राटदाराच्या कामाची चौकशी होणार का?
महामार्गावरील सुरू असलेल्या कामाच्या ठिकाणी योग्य सुरक्षा व्यवस्था, सूचना फलक, बॅरिकेड्स आणि रात्रीच्या वेळी पुरेशी प्रकाशयोजना असणे आवश्यक आहे. मात्र, अशा बाबींकडे दुर्लक्ष होत असल्यास त्याची जबाबदारी निश्चित करणे गरजेचे आहे, अशी मागणी नागरिकांकडून होत आहे.
या दुर्दैवी घटनेची सखोल चौकशी करून अपघातास कारणीभूत ठरलेल्या परिस्थितीची तपासणी करावी, संबंधित कंत्राटदाराच्या कामाची गुणवत्ता तपासावी आणि दोषींवर योग्य ती कारवाई करावी, अशी मागणी परिसरातील नागरिकांनी केली आहे.
एका युवकाचा जीव गेल्यानंतर तरी संबंधित यंत्रणा जागी होणार का? असा संतप्त सवाल आता नागरिकांकडून उपस्थित केला जात आहे.
About The Author
