स्वाराती’ बनावट औषध प्रकरण : दोषींवर कडक कारवाई होणार,
अंबाजोगाई प्रतिनिधी : राज्यातल्या विविध सरकारी रुग्णालयं आणि वैद्यकीय महाविद्यालयात बनावट औषधांचा पुरवठा केल्याप्रकरणी दोषींवर कडक कारवाई करण्यात येईल, असं सार्वजनिक आरोग्य मंत्री प्रकाश आबीटकर यांनी विधानसभेत सांगितलं. अंबाजोगाई येथील ‘स्वाराती’ रुग्णालय व वैद्यकीय महाविद्यालयात देखील बनावट औषधांचा पुरवठा करण्यात आला होता. या घटनेमुळे मोठी खळबळ उडाली होती.
संबंधित दोषी अधिकाऱ्यांचं निलंबन करण्याची आग्रही मागणी करत विरोधी पक्षाच्या सदस्यांनी सभात्याग केला
आमदार सुनील प्रभू यांनी विधानभवनाबाहेर वार्ताहरांशी बोलतांना ही भूमिका स्पष्ट केली. ‘महाराष्ट्रामध्ये खोट्या कंपन्या आणि खोटी औषधं ज्या पद्धतीने वितरीत केली गेली, हा मोठा भ्रष्टाचार आहे. ती कंपनी उत्तराखंडची होती, ती कंपनी अस्तित्वात नसताना देखील ही औषधं खरेदी केली गेली आणि अशा लोकांना पाठिशी घालण्याचं काम हे सरकार करत आहे. सामान्य जनतेच्या आरोग्याशी खेळण्याचं काम करतंय आणि खोटी औषधं विकणाऱ्या मंत्र्यांना आणि अधिकाऱ्यांना हे सरकार पाठिशी घालतंय, असं आम्ही विधानसभेत मांडून आज सभात्याग केलेला आहे.
