*न भूतो न भविष्यती असा मतदारांचा विश्वास घेऊन राजकिशोर मोदी व त्यांच्या सर्व सहकाऱ्यांनी आपले उमेदवारी अर्ज केले दाखल*
*लोकविकास आघाडीचे जोरदार शक्तिप्रदर्शन पाहून विरोधकांचे धाबे दणाणले*
अंबाजोगाई (प्रतिनिधी):- अंबाजोगाई नगर परिषदेच्या सार्वत्रिक निवडणूकीच्या नामनिर्देशन अर्ज दाखल करण्याचा शेवटच्या दिवशी लोकविकास महाआघाडीच्या नगराध्यक्ष पदाचे उमेदवार राजकिशोर मोदी व पंधरा प्रभागातील ३१ उमेदवारांनी अंबाजोगाई शहरात जोरदार शक्तिप्रदर्शन करत आज सोमवार दि १७ रोजी आपले नामनिर्देशन अर्ज दाखल केले. मागील ९ वर्षांपासून अंबाजोगाई नगर परिषदेची निवडणूक झालेली नाही. त्यामुळे नगर परिषदेवर प्रशासक राज होते. लोकप्रतिनिधी नसल्यामुळे लोकप्रतिनिधीचा नगर परिषदेवर अंकुश नव्हता. राज्य निवडणूक आयोगाने नुकताच नगर परिषदेच्या निवडणूक कार्यक्रम जाहिर केला असून सोमवार दि १७ रोजी उमेदवारी अर्ज दाखल करण्याचा शेवटचा दिवस होता.
नामनिर्देशन दाखल करण्याचा अंतिम दिवशी राष्ट्रवादी काँग्रेस अजितदादा गट तसेच राष्ट्रवादी काँग्रेस शरद पवार गट व समविचारी पक्षाची लोकविकास महाआघाडी निर्माण करून या आघाडीचे नगराध्यक्ष पदाचे उमेदवार राजकिशोर मोदी व आघाडीचे सर्व ३१ उमेदवार यांनी आज आपले नामनिर्देशन दाखल केले. अंबाजोगाई शहरातुन काढलेल्या महाघाडीच्या महारॅलीने शहराचे संपूर्ण वातावरण ढवळून निघाले होते. या महारॅलीमध्ये हजारोच्या जनसमुदाय सहभागी झाला होता. यामध्ये नवयुवक , महिला, तसेच जेष्ठ नागरिकांचा उत्स्फूर्त प्रतिसाद दिसून आला. हे वातावरणात पाहून महाआघाडीचे सर्वेसर्वा राजकिशोर मोदी, नानासाहेब गाठाळ, माजी आमदार पृथ्वीराज साठे, बबनराव लोमटे , डॉ नरेंद्र काळे, महेंद्र निकाळजे, दीपक कांबळे, हाजी महमूद, खालेद चाऊस यांच्यासह महाआघाडीचे नगरसेवक पदाचे सर्व उमेदवार हे भाराहून गेल्याचे दिसून येत होते. रॅलीची सुरुवात ही गुरुवार पेठ येथील जोधाप्रसादजी मोदी विद्यालयापासून निघून छत्रपती शिवाजी महाराज चौक मार्गे, सदर बाजार, मोची गल्ली, गांधी नगर , मंडी बाजार , पाटील चौक , मंगळवार पेठ , वीर सावरकर चौक बस स्थानक मार्गे नगर परिषद कार्यालयापर्यंत येऊन सर्व उमेदवारांच्या नामनिर्देशन अर्ज दाखल करण्याने संपन्न झाली.
भव्य अशा या महारॅलीच्या माध्यमातून राजकिशोर मोदी यांच्यावरील मतदारांचे प्रेम व जिव्हाळा तसेच यातून आगामी निकालाची झलक देखील दिसून आली. यामुळे विरोधी गटाच्या पायाखालची वाळू सरकू लागल्याचे स्पष्ट संकेत पहावयास मिळत आहेत.लोकविकास महाआघाडीच्या माध्यमातून अंबाजोगाई शहरात नवनवीन विकासाच्या संकल्पना राबविण्यात येणार असल्याचा संकल्प राजकिशोर मोदी व त्यांच्या सर्व सहकारी उमेदवारांनी केला आहे. कोणतीही तयारी किंवा नियोजन नसतांना सुद्धा मतदार इतक्या उत्स्फूर्तपणे सहभागी झाला होता यामध्ये एकही व्यक्ती ग्रामीण भागातील नव्हता हे विशेष म्हणावे लागेल.
About the Author
