बीड प्रतिनिधी: बीड नगरपालिकेच्या निवडणुकीतील राजकीय समीकरणांना धक्का देत आंबेडकरी चळवळींमधील प्रमुख चेहरे असलेल्या पप्पू कागदे,अजिंक्य चांदणे, बबन वडमारे यांनी मोठी राजकीय भूमिका घेतली आहे. नगरपालिका निवडणुकीत समाजातील अजित पवारांच्या राष्ट्रवादीच्या सोबत जायचे नाही असे ठेवत बहुसंख्य लोक जो निर्णय घेतील त्यांच्या सोबत राहण्याचा निर्णय या तिन्ही नेत्यांनी पत्रकार परिषदेच्या माध्यमातून व्यक्त केला. त्यामुळे आणखी काही दिवस या नेत्यांची भूमिका गुलदसत्यातच राहणार आहे या पत्रकार परिषदेला अजय सरवदे यांचीही उपस्थिती होती.
बीड नगरपालिका निवडणुकीत प्रमुख राजकीय पक्षांनी ऐनवेळी पप्पू कागदे आणि अजिंक्य चांदणे यांची गोची केली होती. तर बबन वडमारे यांनाही झुलवत ठेवले होते. या पार्श्वभूमीवर पप्पू कागदे आणि अजिंक्य चांदणे यांची आंबेडकरी चळवळीतील काही म्हत्वाच्या कार्यकर्त्यांसोबत बैठकही झाली होती. त्यानंतर आज पत्रकार परिषदेतून अजित पवारांच्या राष्ट्रवादीसोबत जायचे नाही असे सांगत समाज जो निर्णय घेईल त्या निर्णयासोबत जाण्याचा निर्णय घेतला. यामुळे प्रमुख पक्षांना मात्र अडचणींना सामोरे जावे लागेल.रिपाई, डीपीआय सोबतच सिद्धार्थ शिंदे,अशोक सोनवणे, दिपक चौगुले,रवी वाघमारे आदींची देखील या पत्रकारपरिषदेसाठी असलेली उपस्थिती राजकीय समीकरणे बदलण्याची नांदी असेल.
निवडणूक लढवणार नव्हतो
आरक्षण जाहीर झाल्यापासून मी निवडणूक लढवावी अशी कार्यकर्त्यांची इच्छा होती, मी फारसा इच्छुक नव्हतो,पण कार्यकर्ते आग्रही होते. त्यानंतर आ. विजयसिंह पंडीत यांनी मला आग्रह केला. अजित पवारांचा निरोप आहे असे म्हणाले. आम्ही राष्ट्रवादीच्या चिन्हावर लढण्यासाठी देखील तयार होतो. माझी उमेदवारी निश्चित होती, पण ऐनवेळी ज्या पद्धतीने मला डावलण्यात आले ते चुकीचे आहे. आम्ही कोणाच्या दारात गेलो नव्हतो, ते आमच्याकडे आले होते. ही प्रवृत्ती वाईट आहे असे यावेळी पप्पू कागदे म्हणाले. याचे परिणाम पंडित कुटुंबाला भोगावे लागतील, आंबेडकरी समाज त्यांना धडा शिकवेल असे कागदे म्हणाले
चळवळ दडपण्यासाठी पोलिसांचा वापर
आमच्यावर दबाव आणण्यासाठी आता पालकमंत्र्यांकडून पोलिसांचा वापर केला जात आहे. मला नोटीस दिली आहे . निवडणूक संपेपर्यंत जेलमध्ये टाकण्याचा त्यांचा विचार आहे. पण आम्ही घाबरणार नाही, तुम्हाला धडा शिकवू असे कागदे म्हणाले
About the Author
