ईश्वर लोहिया यांचेकडून वसतिगृहातील विद्यार्थीनींना ऊबदार ब्लॅन्केटचे वाटप
अंबाजोगाई प्रतिनिधी:-
शहरातील योगेश्वरी शिक्षण संस्थेअंतर्गत असलेल्या सावित्रीबाई फुले मुलींच्या वसतिगृहातील तीस गरीब विद्यार्थिनींना ज्येष्ठ सामाजिक कार्यकर्ते तथा व्यापारी ईश्वर सेठ लोहिया यांनी ऊबदार ब्लॅंकेटचे वाटप केले. संस्था कार्यालयात मंगळवार दिनांक ३ डिसेंबर रोजी केलेल्या आयोजित आयोजित कार्यक्रमास योगेश्वरी शिक्षण संस्थेचे उपाध्यक्ष गणपत व्यास गुरुजी, कार्यकारी उपाध्यक्ष ॲड. जगदीश चौसाळकर ,संचालक ॲड. कल्याणी विर्धे ,संचालक अंगद कराड, स्वप्निल लोहिया, राहुल तापडिया, मेजर एस पी कुलकर्णी, रवी मठपती यांची उपस्थिती होती.
सध्या कडाक्याची थंडी आहे. थंडीपासून बचाव करण्यासाठी उबदार व मऊ ब्लॅन्केटची आवश्यकता असते. योगेश्वरी शिक्षण संस्थेअंतर्गत असलेल्या सावित्रीबाई फुले मुलींच्या वसती गृहामध्ये तीस मुली शिक्षण घेत आहेत. त्यांची थंडीच्या दिवसांमध्ये सोय व्हावी. या उद्देशाने ज्येष्ठ सामाजिक कार्यकर्ते तथा व्यापारी ईश्वरसेठ लोहिया यांनी उबदार ब्लॅंकेट देण्यासाठी पुढाकार घेतला.संस्थेचे उपाध्यक्ष गणपत व्यास गुरुजी, ॲड. जगदीश चौसाळकर यांच्याकडे या ब्लॅंकेट सुपूर्द करण्यात आल्या. सदर उबदार ब्लॅंकेट विद्यार्थिनींना देण्यात येणार आहेत. संस्थेच्या वतीने ईश्वरसेठ लोहिया ,स्वप्निल लोहिया, राहुल तापडिया यांचा सन्मान व सत्कार करण्यात आला. गरीब व होतकरू विद्यार्थ्यांना वेळोवेळी मदतीचा हात पुढे केला पाहिजे. त्यांच्या अडीअडचणी समजून घेतल्या पाहिजेत. शक्य झाल्यास आर्थिक मदतही केली पाहिजे. विद्यार्थ्यांना शिक्षणाच्या प्रवाहात ठेवण्यासाठी समाजातील दानशूर व्यक्तींनी पुढे यावे असे आवाहन ईश्वरसेठ लोहिया यांनी सत्कारास उत्तर देताना केले. गणपत व्यास गुरुजी, ॲड. जगदीश चौसाळकर यांनी आपले मत व्यक्त करून लोहिया यांनी केलेल्या मदतीबद्दल आभार व्यक्त केले. कार्यक्रमाचे सूत्रसंचालन व आभार सेवानिवृत्त प्राध्यापक गणेश पिंगळे यांनी व्यक्त केले.
